【大學Info Day】大學資訊日之謎？拆開2大收生、選科迷底

過多個月新一年既文憑試又開始啦，各位準考生關心考試之外，其次就一定係JUPAS排選既問題。小編都深深地體會過當年選科各式各樣既煩惱，中學畢業後，亦都試過去學校分享選科同學習心得。Tutor Circle尋補話你知如何好好利用大學咨詢日。
同唔同既準考生傾過之後，發現其實好多同學都比JUPAS依個遊戲玩到一頭霧水。其實選科講起泥好簡單，成日大家都話想揀個自己心儀既科目或者入大學，但要揀之前，當然要清楚了解一下自己既興趣同每一科到底讀緊啲咩啦。其中一個方法不外乎就係去大學既開放日啦。每年9-11月，各間大學都會舉辦開放日，名義上係希望製造一個Platform比中學生參觀，了解更多既資訊。但實際上我只認為係一個比各大學Do Show 既時間。

謎底一: 官方收分成績可唔可信？

大學資訊日最重要既任務就係要收集有興趣既科目既官方收分成績(可以話你知其實上網咩都有)，但其實個個分數真係只供參考，大家唔好太認真。唔少朋友升上大學後，其實都話DSE成績一點都唔緊要，上到泥就人人平等，已經無人會再拎DSE成績去講。
的而且確，讀左大學一個月後，無人會再關心DSE成績 (但會不停關心GPA…)，但大家點都會有些少好奇自己係以咩分數考入自己間大學，mean？ lower quartile？ Minimum？從而，發現自己明明低過Minimum，但卻成功入倒依個學科。但可能就話係因為有面試而加分，但某幾位同學都無參與過面試而係直接取錄，咁事實到底係點？
相信大家都會明白，正常一間大學都希望自己學校可以取錄到較多既精英，而官方收分成績提高少少，可以令成績較好的同學都將自己既科目放係A2/A3位置，從而吸納一些可能在DSE失手的精英。
除此之外，提高官方收分成績可以令外界覺得依科好搶手好熱門，好多高分既學生泥讀，可以增加名氣。以上內容當然無得到過官方既證實，但都係個句，「A1拎泥博，A2擺係Mean，A3要穩陣」，所以大家如果係低過Mean既話真係都唔好太驚。咁當然每年數據都唔同，老套啲都係咁講，數據只供參考。

謎底二: 鐘意數學就應該要揀數學科？

其實中學所讀既野同大學好唔同，大學著重theory，而中學著重Calculation。所以其實表面上既數學科未必同你心目中諗既數學係一樣。而為左了解更多學科既資訊，想當年小編都有自己依家讀緊既學科到聽講座同詢問，而入左泥之後就發現完全係兩回事。
首先，學科講座通常都係講一點好簡單易明既內容，同埋主要係比學校曬命曬命同曬命！咁到底你聽完依個學科講座，你既得著會係咩？覺得依個學科好勁、好威、前途無可限量。
岩呀，咁既話依個學科講座就叫係成功，佢地就係希望你覺得佢好勁之後有多點學生揀佢。但你實際可以得到同你揀科有關既資訊？可以話係少之又少。當然撇除你本身去左聽一個對佢零認知既學科啦。
咁到底點先可以有效地獲得中立既資訊，就係問讀緊個個學科既學生。咁點解唔建議問教授？因為教授永遠都會講到天上有地下無咁，令一些家長覺得佢個學科好好。而學生就會相對上比較客觀，可以設身處地咁話比中六既學生知依個學科辛唔辛苦、有咩特別咁，其實你有無諗過佢地可能都對佢要介紹既學科無咩認知？

係真架！以清水灣大學為例，無論係以前定以家都係以學院收生模式，意思就係入左泥之後第二年/第三年先會揀主科。做得開放日幫手咁既學生好多時都係一年級生，試問入左泥1-2個月，又未讀過要介紹既學科又點會知道清楚呢？咁當然程序上係有事前briefing咁，但去唔去就第二回事啦。其他大學係點就不易多評，但開放日需要大量既幫手，好多時都只有一年級生會去做廉價或者無價勞工，當然上莊除外。
所以，當認知少又要介紹學校，最後咪又係變左吹水環節。講左咁奈好似講到大學開放日一無用處咁，咁當然開放日有助中學生幻想一下大學生活既美好既，從而鼓勵佢地學習。其他方面既優點我就真係唔多諗倒，現實一啲，花多啲時間去溫書，拎個好grade好似重實際。選科既問題都係留返去考完試再諗啦！
如果真係係選科既時間覺得好迷茫，建議問一問一啲認識既師兄師姐或者學校既選科老師，根據自己興趣作評估，唔好單單根據資訊日得到既所見所聞而作決定。以上只屬個人意見，如有謬誤，請見諒。