【行勻十八區・好玩好食大搜羅】- 西貢區（將軍澳）篇

【行勻十八區・好玩好食大搜羅】– 西貢區（將軍澳）篇

Post author:小雲
Post category:吃喝玩樂
Post published:2019-02-05
Post last modified:2019-02-05

日日都去旺角、尖沙咀、銅鑼灣，人又多車又多，仲要黎黎去去都係果啲野，真係你唔悶我都悶啦！想同朋友仔，男/女朋友仔出去玩又想有啲新意，呢個系列一於帶你走入冷門啲嘅約會地點，重新探索香港。其實香港十八區，區區都有名物架！而家就即刻起身換衫，拎埋個袋，今日就同Tutor Circle尋補一齊走進西貢區睇下有咩玩啦！

開始之前，要同大家介紹一下西貢區包括啲咩地方，西貢區係唔止西貢架，成個將軍澳新市鎮，即係包括寶琳、坑口、將軍澳市中心、調景嶺等等，都係屬於西貢區嘅。而作為新發展嘅區域，入面各樣設施齊備，仲有好多親子好去處tim啊，岩晒一家大細度過一個悠閒嘅周末！

1. 香港單車館

香港單車館(Hong Kong Velodrome)位於將軍澳寶康路105-107號，係本港首個符合國際自行車聯盟標準嘅室內單車設施，係一個好新，好大，好靚嘅體育館，而佢最特別嘅地方，除左係踩單車嘅場地之外，就係入面果個面積約286平方米嘅兒童遊戲室，係康文署轄下第六大嘅兒童遊戲室，並且係以極限運動為主題，岩曬貪玩嘅小朋友。
將軍澳親子
（圖片來源自網上）

2. 單車館公園

單車館公園同上面所講嘅香港單車館係兩個地方黎嘅，雖然都係係附近，但單車館公園就係另一個世界喇。單車館係前衛時尚嘅設計，而公園裡面就係大自然嘅感覺，園內嘅中央草坪十分之廣闊，好適合野餐，又或者係度hea返個晏晝。公園入面仲有個人工湖，同埋模型船水池，真係一個享受悠閒下午時光嘅好地方啊。
將軍澳親子
（圖片來源自網上）

3. 坑口Food Lane

係坑口嘅一個商場TKO Gateway，前排就係地下果層開左條Food Lane，就好似一個室內小夜市咁，有好多小食攤檔，包括又美食車進駐到商場嘅豪園小食炸一字雞翼、成日行過旺角都聞到好香嘅長條泡芙Smuki、台式小食店，同埋各款台式手搖飲品，絕對可以滿足你掃街嘅願望！仲係科大人嘅最愛tim！

（圖片來源自網上）

4. 西貢海小島

相信大家假日入西貢，大多數都只係會係西貢市中心閒逛，以雪糕車為中心，對出成條沿海嘅行人路有好多船家招攬生意，佢地會載遊客去西貢海附近嘅地方，例如比較出名嘅三星灣同半月灣，人煙相對稀少，水清沙幼，中意去沙灘嘅朋友真係不容錯過；另外鹽田梓村都係一個比較出名嘅景點，鹽田梓，而家所有居民都已經搬走晒喇，島上可以認識以往漁村歷史，仲有一座二級歷史建築—聖若瑟小堂，已經係島上落成左超過120年喇。
將軍澳親子
（圖片來源自網上）

5. 行山好去處

除左海，西貢都有好多行山嘅好地方，例如：大浪灣、北潭涌、浪茄、萬宜水庫，呢啲廣為人知嘅行山路線都係位於西貢架，如果各位行山愛好者已經行厭左以上嘅行山路線，係西貢呢邊仲有科大！香港科技大學位於清水灣，附近有幾條行山踲好路線，比較少人行，適合新手容易行嘅又有，有少許挑戰性嘅都有，例如：小夏威夷徑、鴨仔山、魷魚灣村、白水碗等等，不過提提大家西貢一帶比市區大霧，春天同埋能見度較低嘅日子就要盡量避免喇。
將軍澳親子
（圖片來源自網上）

假日想抖下，唔一定要離開香港出走出旅行嘅。香港你都未去晒，或者你有機會搵到屬於自己嘅一片小天地呢！
今次同大家去左西貢區先！下次我地第二個區再見～

【延伸閱讀】【行勻十八區・好玩好食大搜羅】– 荃灣區篇
【延伸閱讀】【行勻十八區・好玩好食大搜羅】– 沙田區篇