小學補習

【小學補習】你的子女需要補習嗎?

studentconversion
tutor registration

幼稚園升上小學,小朋友開始接觸新既學習環境同課程,家長自然就會開始擔心,自己又冇時間湊個仔,又怕唔識教,一個唔覺意小學個底打得唔好,啲成績跟唔上,就會影響大好前途,所謂「萬丈高樓從地起」,搵間補習社或者補習老師睇住,洗少少錢,可以保證小朋友既將來,又可以騰多啲時間出黎,你話係咪一舉兩得?話雖如此,但你個仔真係適合補習嗎?Tutor Circle尋補幫你分析啦!
 


點解要幫小朋友搵補習?

1. 唔識教

香港小學既課程內容愈黎愈難,又愈黎愈多,尤其是啲英文更加難搞,就算家長自己識都好,都唔一定有方法去教,你知啦教小朋友係一門學問黎架嘛,佢地又容易分心,又唔知佢地識啲咩,請個補習老師或者放佢去補習社就最好,有專人教慣教熟(事實係未必真係識教)。

小一補習 - parents
小學課程愈黎愈難,家長亦未必識教。

2. 冇時間

係香港呢個繁忙既城市入面,唔少家長雙親都需要工作,雙職家庭、單親家庭愈黎愈多,邊有咁多時間教個仔呀,收左工都冇精神啦!係咁既情況下,搵補習除左可以教識小朋友,仲可以當補習社係托兒所,將個仔放係補習社,又有老師睇住,衰極都有個譜!



小一補習 - work
愈黎愈多雙職家庭,小朋友放左學,大人又未放工,去補習社仲可以幫手睇一睇住小朋友。

3. 學更多,行先一步

比個仔女學定先實冇死,塞得愈多知識比佢,就學得愈多,就算唔叻過其他人好多,當預習定先都唔洗驚之後跟唔上進度呀嘛,所謂「贏左起跑線」上,就係呢一種啦。


Copyright © 2023 Tutor Circle 尋補. All rights reserved. 此文章未經許可,不得轉載。
Copyright © 2023 Tutor Circle 尋補. All rights reserved. 此文章未經許可,不得轉載。
小一補習 - study
去補習社仲可以幫手預習定課本,上堂更加易聽得入腦。


延伸閱讀:【英文補習】中小學英文補習社/私補推介
 

聽落好似好多好處咁喎,咁點解唔補呀?

1. 近朱者赤,近墨者黑

將小朋友放係補習社,好聽啲講就會有老師睇住,其實老師一個睇到幾多個呀,一班成十幾人,影響得小朋友最多既一定係佢地補習班上面既朋友!朋友呢家野,如果係乖啲好學啲既,都還好(但係咁乖又點會比人放係補習社先),如果成日同啲比較冇紀律既小朋友一齊玩,自自然就會染上相同既價值觀,最壞既情況就係變得唔專心、懶散、反叛⋯⋯

小一補習 - children
如果一齊補習嘅小朋友態度散漫,好容易會受到影響。

2. 依賴心理

家長好慣性會幫小朋友安排好晒一切,由補習班、興趣班到校內既課外活動都由家長做主,因為覺得小朋友唔識諗(建議唔好低估左佢地)。久而久之,佢地就會覺得世界上既野都係比人安排好晒,漸漸就會好依賴,依賴父母對佢地既安排,依賴補習社或者補習老師去幫佢地溫書,咁樣落去,小朋友係唔會識得長大,愈黎愈唔成熟,後果就係當佢地遇到一啲問題既時候唔識得自己解決,更令人擔心既係,佢地唔識得獨立,凡事都依賴他人,大大影響左佢地既個人成長同人際關係。
 

3. 失去學習興趣

小一補習
學習好多時係講求主動性同積極性,要自己想去學習先至會有心機去學好。但係補習強調既係由其他人去主導成個學習既過程,小朋友根本冇得揀,所有野都係被迫去吸收,所以往往就愈讀愈冇心機,試諗下,係一個高壓既環境下,比人鬧比人罰,點會仲對讀書有興趣呀!補習有機會令小朋友失去學習既興趣同意欲,呢樣真係要非常小心,連最基本既好奇心都冇埋既話,小朋友都唔慌會學得好!
 

4. 浪費時間

小一補習
補習社既最主要目的都係幫小朋友跟好晒啲功課,預習多少少聽日既野,如果仲有時間就會狂塞練習比小朋友做。小學既功課量時多時少,有時候功課好快做完,但係小朋友為左避開更加多既功課同額外補充練習,緊係會「嘆慢板」,唔同你急,一樣本身15分鐘做完既野拖到2個鐘都未做完,同朋友吹下水,買下野食。浪費時間唔緊要,最怕小朋友為左「dum波鐘」變得愈做愈慢,變到冇晒效率,所以補習社遲放既情況真係屢見不鮮。
 

5. 死做唔識解

要知道補習老師係冇任何責任去make sure你個仔一定明晒所有野,佢只係有職責幫你既小朋友做晒功課同對答案,最多考試既時候做多兩本exercise。係咁樣既學職氛圍下,小朋友隨時會為左完成duties而不求甚解、盲目去做,根本唔明白背後既意思,囫圇吞棗。咁樣學完一大堆野其實冇意思,做完之後都只會將所有野還返晒比呀sir miss,「左耳入,右耳出」。
 

總結

其實唔想仔女咁辛苦,又想搵個人跟下你個仔既功課,最好緊係請個私補老師,一對一同你個仔上堂,又唔怕學壞,有彈性夾時間上堂,唔洗日日都去變左依賴,有需要既時候先補,咁就唔怕小朋友對讀書冇晒興趣啦!不過都要提醒各位,1 on 1補習一定會貴少少,以下有價錢既參考。
 
延伸閱讀:
【私人補習價錢】最新2021私補價錢 5大因素影響收費!
【補習老師】找補習老師注意7大特質 最多人忽略XX而中招

*此文章由 Blogger個人/編輯團隊 分享並僅供參考,意見及內容並不代表本網誌立場,Tutor Circle 尋補 對信息或內容所招至的損失或損害,不會承擔任何責任。
小學補習
小學補習

尋補?Tutor Circle!

其他人還看了……

中學排名  呈分試  升中面試  英文補習
大學收分  Jupas  副學士  DSE筆記
大學五件事  私補價錢  Ocamp  暑期工
生日好去處  IQ題  任坐Cafe

留言